KORONADAL CITY- Nakakas bisan papaano ang kasubo sang pamilya ni Police Senior Inspector Ryan Pabalinas, isa sa fallen 44 sang Special Action Force (SAF) sang Philippine National Police (PNP) nga napatay sa Mamasapano clash makaligad ini nga ginpatindugan sang rebulto bilang pagkilala sa iya pagkabaganihan.
Sa interbyu sang Bombo Radyo Koronadal kay Ginang Nanette Pabalinas, tiya ni Police Senior/Insp. Ryan Pabalinas, ang nasambit nga rebulto ang ginpatukod malapit sa Camp Lira sa syudad sang General Santos City kun sa diin may ginpatigayon nga wreath laying kagaina kag may ginpatigayon man nga misa para sa SAF 44 commandos.
Dugang pa sini nga natalana man ini nga pangalanan bilang Pabalinas Memorial Park kun sa diin ginkalipay sang ila pamilya nga wala nalubong sa lipat ang sakripisyo sini kag sang iya mga kaupdanan nga napatay sa encounter.
Samtang kadungan sang ikatatlo ka tuig nga anibersaryo subong nga adlaw sang madinuguon nga engkwentro sa Tukanalipao, Mamasapano, Maguindanao nagalaum ang pamilya Pabalinas nga maangkon sang SAF 44 ang hustisya sa idalum sang Duterte administration kag ginpahayag sini nga kuntento na sila sa dalagan sang kaso.
