KORONADAL CITY- Ginaangot subong ang duha ka matag-as nga opisyal sang South Cotabato sa rebelde nga New People’s Army (NPA).
Ini makaligad nga gin-ako ni Lt. Col. Harold Cabunoc, commanding officer sang 33rd Infantry Battalion sang Philippine Army nga may mga ebedensiya sila nga makapamatuod sa koneksiyon sang nasambit nga mga opisyal sa mga rebelde.
Suno sa iya, luyag niya nga ang nagsungka nga si “Ka Efren” ukon Noel Legaspi sa matuod nga kabuhi nga deputy secretary kag tigpamaba sang CPP-NPA Far South Mindanao Region ang magahatag sang pangalan sang nasambit nga mga opisyal.
Suno pa kay Cabunoc nga isa ka local executive officer kag legislative officer sang South Cotabato ang supporters sang rebelde nga grupo.
Samtang, nagapabilin naman sa kustodiya sang 27th IB Philippine Army ang nagsungka nga si Ka Efren.
Ginkumpirmar man sang militar nga may mga ginbuyagyag na ang nagsungka nga opisyal sang NPA angot sa operasyon sang ila nga grupo.
Apang, nagpamalibad naman nga idetalye sang,militar ang nasambit nga mga impormasyon.
