KORONADAL CITY- Nagtuga sang tuman nga pagkaalarma sa syudad sang Koronadal ang pagdamo sang mga bata nga SUKARAP ukon mga bata nga myembro sang Sugal, Kawat, Rape Group nga nagapang biktima sang syudad kada gab-i.
Nahibaluan nga ginakabig nga dako nga perwisyo ang nasambit nga mga kabataan nga nagapang-atake kun sa diin target sang mga ini ang mga establisemento kag ang mga motorista.
Ginkondinar naman sang mga pumuluyo sa syudad ang asud-asod nga pag-atake sang mga SUKARAP makaligad ginbato-patay sang mga ini ang isa ka motorista nga si Nonie Rodriguez, 25 anyos nga residente sang Poblacion, Tupi, South Cotabato samtang ginasubay sini ang Gensan Drive sa syudad, dugang pa sini nga isa ka driver ang pilason makaligad ginbato man sang mga SUKARAP ang ginamaneho sini nga traysikol kag isa ka dalaga ang ginkulata makaligad ila nga gintripan ang nasambit nga grupo sa tunga sang pyesta sa syudad samtang ginkulata man sang mga ini ang isa ka bouncer sang balay bululngan nga si Jay Dumagpin makaligad sini nga gindumilian ang mga SUKARAP nga makasulod sa establisemento.
Sa subong madamo naman sang mga residente sa syudad kag mga negosyante ang nagpanawagan sa Koronadal City PNP nga gilayon aksyunan ang nasambit nga problema kun sa diin madamo ang nagapangbiktima.
Nagapati naman ang kadamuan nga kontrolado kag protektado suno pa sang isa ka sindikato ang nasambit nga mga kabataan nga nagahimo sang krimen.
