KORONADAL CITY – Nagdihon na sang isa ka taskforce ang kapulisan agud nga maresolbar ang serye sang pagpangluthang-patay sang riding in tandem sa siyudad sang Koronadal.
Sa interbyu sang Bombo Radyo Koronadal kay PSSUPT. Franklin Alvero, ang pagdihon sang nasambit nga taskforce ang may tinutuyo nga matutukan kag maimbestigaran sang maayo ang asod-asod nga pagpamatay sa siyudad.
Ini makaligad nga naglab-ot na sa pito ang napatay sa pagpangluthang sang riding in tandem gikan lamang sang bulan sang Disyembre 2017 tubtob Enero 2018 kun diin wala pa sang may nadakpan nga mga suspek.
Samtang, aminado naman si P/Supt. Ronald Allan Peñaverde, hepe sang Koronadal City PNP nga kahimuan sang mga hired killers ang serye sang pinatyanay sa siyudad.
Suno kay Peñaverde, ginaistudyuhan nila sa subong ang tatlo ka motorsiklo nga wala sang mga plate number na masami ginagamit sang mga suspek.
Isa man sa ginalantaw nga anngulo ang pagkainvolbar sa illegal nga droga sang mga biktima kun ngaa natabo ang krimen.
