KORONADAL CITY- Nakatalana nga pasakaan sang kaso nga paglapas sa R.A 10591 ang isa ka barangay chairman kag tano sa banwa sang Arakan, North Cotabato makaligad nga madakpan sa checkpoint kag makumpiskaran sang high powered firearms kag mga bala.
Ginkilala ang mga ini nga sanday Jorry B. Villa, 40 may asawa kag isa ka elected Brgy. Chairman sang Brgy. Badiangon kag Jennifer V. Sanan, 30 anyos isa ka Brgy. Tanod nga mga residente sang Brgy. Badiangon, Arakan North Cotabato.
Ang 2 ang nadakpan sa tunga sang checkpoint sang gintingob nga pwersa sang Cotabato Police Provincial Office Mobile Force Company nga sakay sang isa ka Honda XR200, duag pula nga may plate number nga 3044 KE nga ginamaneho ni Villa sa ginpatigayon nga Oplan Lambat Bitag sa Crossing Brgy. Tuael, Brgy. Binay, Magpet North Cotabato.
Sa pagtsekyar sang mga otoridad sa ila motorsiklo, didto nagkibot sa ila ang isa ka steel magazine sang M16 rifle nga nakuha sa bulsa sang jacket sang brgy. chairman kun sa diin nakabutang ang 3 ka 5.56 live ammunition.
Bangud sini ginhalungkat pa ang iban nga mga dala sang mga suspek kag didto man nakit-an ang 277 kabilog nga 5.56 live ammunition halin sa posisyon ni Sanan.
Gilayon naman nga gin arestar ang 2 nga ginpaidalum sa imbestigasyon bangud sa kadamuon sang bala nga ila dala.
