KORONADAL CITY- Ginpasiguro ni South Cotabato Governor Daisy Avance-Fuentes nga sabton sang Provincial Government ang tanan nga gastos kag pagpalubong sang 2 ka mga napatay kag pagpa-ospital sang 3 ka pilason sa nagluntad nga karambola sang 2 ka motorsiklo kag sang dump truck sang probinsya sa Prk. Paraiso Brgy. Reyes sa banwa sang Banga South Cotabato.
Sa esklusibo nga interbyu sang Bombo Radyo Koronadal kay Gov. Fuentes indi nila pagakunsintihon ang driver sang Dump Truck sa tion nga mapamatud-an nga may kapabayaan ini sa nagluntad nga aksidente.
Kun madumduman nga na identify ang mga napatay nga sanday Jonilo Deceño nga residente sang Brgy. Zone 2, Surallah South Cotabato kag Joril Felongco sang Bambad, Isulan Sultan Kudarat samtang ang mga pilason naman amuh sanday Rogie Postanes kag Dodong Sedeño kag ang yara sa kritikal nga kondisyon nga si Cyrus Salarda, 23, single kag residente sang Kalawag 2, Isulan, Sultan Kudarat.
Nahibaluan nga ini na ang pinaka madinuguon nga road accidente nga nagluntad sa pinaka una nga semana sang Enero, 2018 sa probinsya sang South Cotabato.
