KORONADAL CITY- Nagapabilin nga yara sa state of shock sa gihapon ang iloy sang isa ka South Cotabateña nga kalakip sa mga nasunog sa 38 ka mga call center agent sa NCCC fire sa syudad sang Davao.
Sa ekslusibo nga interbyu sang Bombo Radyo Koronadal kay Rodel Omanio, himata sang biktima, tuman ang nabatyagan nga kasubo sang iloy ni Rhenzi Nova Muyco, 25 anyos nga residente sang Brgy. Yangco, Banga, South Cotabato sa nadangatan sang bata.
Suno kay Omanio, wala pa sila naka desisyon sa subong kun sa diin igahaya si Nova bangud indi pa ma-istorya ang iloy sini.
Sa oras nga maka-desisyon suno pa ang pamilya Muyco posible nga dal-on ang bangkay sini sa banwa sang Banga, South Cotabato.
Nahibaluan nga si Nova ang isa ka working student sa syudad sang Davao kag isa ka tuig nalang kuntani maga-gradwar na ini sa kolehiyo.
Kaangot sini, nahibaluan nga isa pa ka South Cotabateño ang patay sa makangiridlis nga sunog nga halin sa gihapon sa Brgy. Liwanay, Banga, South Cotabato nga ginkilala kay Jim Benedict Quimsing, 28 anyos, kun sa diin ginlaragway nga isa ka maboot nga bata.
Suno naman sa himata sini nga si Jose Doquisa,nagapangasubo ang ila pamilya sa nadangatan sang biktima.
Posible suno pa nga Davao na lamang ini igalubong bangud diri na nakabase ang ila pamilya.
