KORONADAL CITY – Nagpaguwa na sang kamanduan si South Cotabato Governor Daisy Avance Fuentes sa South Cotabato PNP nga pahalinon na ang mga raliyesta nga tubtub subong nagapabilin sa atubang sang kapitolyo sang South Cotabato.
Kun maduduman, pila ka semana na nga nagatinir ang mga ini sa atubang sang kapitolyo nga suno pa nagtuga na sang indi manami nga epekto ilabi na nga naglapta na ang mga basura, pangsot nga palibot kag indi na makasulod sa kapitolyo ang mga luyag magpakuha sang laragway sa ginhanda nga white christmas decorations.
Suno sa gobernadora nga oras na agud usaron ang layi agud masunod ang nagakadapat batuk sa mga nagapakatig-a nga mga raliyesta.
Una sini, nagpaandam ang mga raliyesta nga magpabilin ang mga ini sa lugar apisar magpaskwa tubtub nga wala sila ginaatubang sang gobernadora.
Apang una na nga nagpanindugan si Governor Fuentes nga wala ini sang plano nga atubangon ang mga raliyesta.
Nag-ugat ang protesta sa suno pa kawad-an sang tikang sang gobyerno sa nagluntad nga engkwentro sa Brgy. Ned, Lake Sebu, South Cotabato nga ginkapatay sang suno pa mga lumad.
