KORONADAL CITY – Ginakabalak-an sa subong sang militar ang pagdamo pa sang mga estudyante nga lumad sa Mindanao Interfaith Services Foundation Incorporated ukon MISFI nga ginakabig nga revolutionary school.
Kun madumduman, ang MISFI academy ang wala sang nagakaigo nga lisensya agud nga mag-operar.
Sa eksklusibo nga interview sang Bombo Radyo Koronadal kay 2nd Lt Ranjan Palacio, spokesperson sang 27th Infantry Battalion Philippine Army, ila nga ginkakibot nga may yara sang MISFI academy sa Sitio Blit , Brgy. Ned Lake Sebu South Cotabato nga isa naman ka hilit nga lugar kag kaiping lamang sang lugar sa diin natabo ang engkwentro sa tunga sang mga suldado kag NPA Front 73 nga ginkamatay sang 9 lakip na ang leader sang Platoon Myphone.
Madumduman nga anay man nga ginkilala nga isa ka revolutionary school ang MISFI academy sa Brgy. Lam-apos Banga, South Cotabato.
Kaangot sini, nagpahanumdom ang militar sa pamunuan sang MISFI Academy sa ila nga matuod nga tinutuyo sa pagpatukod sang buluthuan nga sa subong kwestyunable.
Kaangot sini, magapatigayon sang imbestigasyon sa nasambit nga buluthuan labi na kag may nakita nga mga dokumento nga ginapanag-iyahan sang NPA kag may tatak nga MISFI academy.
