Mandatory evacuation ginpatuman sa Lake Sebu, South Cotabato sa AFP-NPA clash

KORONADAL CITY- Ginmando na sang Provincial Government sang South Cotabato ang pilitanay nga pagpabakwit sa mga nabilin nga residente nga apektado sang kinagamo sa tunga sang military kag sang New People’s Army sa Brgy. Ned Lake Sebu, South Cotabato.

Sa interbyu sang Bombo Radyo Koronadal kay South Cotabato Provincial Disaster and Risk Reduction Management Office Chief Mila Lorca, ginpatuman ang mandatory evacuation kasunod sang nagapadayon nga baslanay sang lupok sa tunga sang tropa sang gobyerno kag sang rebelde nga grupo.

Ginakabalak-an man nga madamo pa nga mga kabataan kag mga tigulang nga lumad nga yara sa area kun sa diin nagaluntad ang
engkwentro.

Kaangot sini naglab-ot naman sa 141 ka pamilya ang nagapabilin sa gihapon sa evacuation center kag suspendido sa gihapon ang klase sa nasambit nga lugar agud maprotehiran ang seguridad sang mga estudyante kag mga manundlo.