KORONADAL CITY- Gina-imbestigaran na sang Sultan Kudarat Police ang apat nga mga myembro sang ginapatihan nga New People’s Army nga nagpalagyo sa nagluntad nga engkentro sa tunga sang tropa sang 27th Infantry Battalion kag 33rd Infantry Battalion Philippine Army batuk sa komunista kag terorista nga New People’s Army sa Brgy. Ned Lake Sebu South Cotabato.
Nahibaluan nga una na nga nabalabagan sang mga katapo sang Bagumbayan PNP ang 4 ka mga ginapatihan nga rebelde lakip na ang isa ka pilason sa Brgy. Poblacion Bagumbayan Sultan Kudarat nga nagpatigayon sang checkpoint.
Kaangot sini, gilayon nga ginpaidalom sa interogasyon ang mga nadakpan nga sanday Armando Barot, Jack Mayor Tataw, Berto Dudem Laud kag Jeffrey Ambag Beñan nga may igo sang bala sa kilid sang iya lawas.
Ginkaalarma naman sang mga otoridad nga sakay pa ang mga ini sang Brgy. Ned Lake Sebu South Cotabato patrol vehicle kun sa diin dako ang pagpati sang mga otoridad nga mga terorista ang mga ini nga nagpalagyo kadungan sang mas ginpahugtan nga NPA crackdown sang militar.
