KORONADAL CITY- Hatagan na lamang sang tubtub Enero 2018 ang SUMIFRU banana plantation agud solosyunan ang mga problema nga ginapangatubang nga rason sang pagbarikada sang mga katutubo sa banwa sang T’boli, South Cotabato.
Ini matapos nga magpatunga na si T’boli Mayor Dibu Tuan agud makigdayalogo sa mga T’boli tribe kag iuntat na ang pagbarikada sa nasambit nga kumbyuhan sang saging.
Sa interbyu sang Bombo Radyo Koronadal sa alkalde, ginpahayag sini nga gin istorya niya mismo ang mga katutubo nga iuntat na ang blackade sa dalan kag nagpadala naman sang sulat sa nasambit nga kumbyuhan matapos makit-an nga madamo suno pa sang bayolasyon.
Bilang solusyon, napasugot na sini ang duha ka kampo nga magbayad sang 2 years advance ang SUMIFRU sa mga land owners.
Ginkumpirmar man sang alkalde nga nakit-an nga napabay-an sang kumbyuhan ang ila social responsibility kasubong na lamang sang health concern kag nagdamo ang langaw sa palibot.
Nagpaandam naman ini sa kumbyuhan nga kun indi sa gihapon makay-o ang problema indi na ini magahatag pa sang Mayors permit.
