KORONADAL CITY – Mabug-at sa gihapon sa kasing-kasing sang mga bata ni Ernesto Bombo Bart Maravilla, anay chief of reporter sang Bombo Radyo Koronadal, isa sa mga biktima sang Maguindanao massacre ang pagpadulong sa massacre site kadungan sang paghanduraw sang ika 8 ka tuig nga anibersaryo sang madinuon nga krimen.
Suno sa pamilya ni Bombo Bart, kada tuig sila nga nagabisita sa massacre site kag apisar nagbag-o na ang palibot sini bangud napalibutan na sang banana plantation ang Sitio Masalay, Brgy. Salman Ampatuan, Maguindanao, mapanan-aw sa gihapon nila ang masakit nga gindangatan sang ila ama nga ginlubong sang buhi kaupod ang iban pa nga mga biktima.
Nahibaluan nga kasubong sang nakaandan, nakaangkon sang convoy ang pila pa ka mga himata sang mga biktima sang massacre kahapon padulong sa masacre site kag nagpatigayon sang misa ka programa.
Naghalad man sang mga bulak, pagpangamuyo kag nagsindi sang kandila ang mga ini sa mga lapida nga may nakapagkit nga mga pangalan sang mga biktima.
Kadungan sini nagalaum naman ang mga nagpadulong sa massacre site nga makaangkon sang positibo nga development ang pakigsapol ni Pres. Rodrigo Duterte sa mga kaupdanan nila sa Malacañang kahapon.
Suno kay Jancine Maravilla, apisar tuigan sila nga magapadulong sa massacre site, indi sila maga-untat tubtob indi mahatag sang tigayon ang hustisya nga ila ginahulat.
