KORONADAL CITY – Nagsaka na sa masobra P14M ang damyos nga napagkit sa asod-asod nga kalamidad nga nag-igo sa probinsiya sang South Cotabato.
Ini ang ginkumpirmar ni South Cotabato Provincial Disaster and Risk Reduction Management Officer Milagros Lorca sa interbyu sang Bombo Radyo Koronadal.
Bangud diri, igarekomendar sang PDRRMO nga ipaidalom na sa state of calamity ang probinsya agud nga magamit ang quick response fund labi na nga asod-asod ang deklarasyon sang state of calamity sa 4 ka mga banwa sa probinsiya bangud sa kalamidad.
Kun madumduman una nga nagdeklarar ang banwa sang Tantangan sang state of calamity matapos malubog sa baha ang pila ka mga puluy-an nga ginsundan sang mga banwa sang Tampakan bangud sa malapnagon nga baha, landslide nga ginsundan naman sang banwa sang Tupi nga gindalasa sang baha, landslide kag buhawi kag bayan sang Lake Sebu bangud sa fish kill kag landslide..
Sa subong, nagapadayon pa ang assessment sa damyos nga gintuga sang kalamidad sa nasambit nga banwa kag lauman nga madugangan pa ini..
