KORONADAL CITY– Natalana nga igapaidalom sa state of calamity ang bug-os nga probinsya sang South Cotabato bangud sa asud-asod nga pagpanalasa sang mga kalamidad sa pila ka mga kabanwahanan.
Sa interbyu sang Bombo Radyo Koronadal kay South Cotabato Provincial Disaster and Risk Reduction Management Officer Milagros Lorca, igarekomenda nila nga ipaidalom sa state of calamity ang probinsya agud mausar ang quick response fund ilabi na nga asud-asod ang deklarasyon sang state of calamity sang pila ka mga banwa.
Kun madumduman nga una nga nagdeklarar ang banwa sang Tantangan South Cotabato sang state of calamity makaligad malumos sa baha ang pila ka mga puluy-an nga ginsundan naman sang banwa sang Tampakan South Cotabato bangud sa malapnagon nga pagbaha, dahil sa landslide kag pagtiphag sang bukid nga ginsundan naman sang Tupi South Cotabato nga gindalasa sang baha, landslide kag buhawi.
Sa kasamtangan, gindalasa man sang landslide ang banwa sang Lake Sebu South Cotabato bangud sa pagbubo sang mabaskog nga ulan kag na-eksperyensyahan nga fish kill bangud sa pagbag-o sang paniempo.
Sa subong ginahibalo pa ang kabug-usan nga damyos nga natuga sa probinsya bangud sa nasambit nga mga kalamidad.
