KORONADAL CITY– Nagapati si South Cotabato Governor Daisy Avance-Fuentes nga isa ka dako nga sindikato ang yara sa likod sang asud-asod nga pagpatay sa mga katapo sang South Cotabato PNP kag opisyal sa syudad sang Koronadal.
Sa interbyu sang Bombo Radyo Koronadal sa gobernadora, makaalarma na ang nasambit nga panghitabo makaligad ang pagpangluthang kay PO2 Charlie Liva sa banwa sang Tupi South Cotabato nga padulong kun tani sa Police Regional Office 12 sa syudad sang General Santos City.
Suno kay Gov. Fuentes, sa intel monitoring sang South Cotabato PNP isa ka dako nga grupo sang sindikato ang yara sa likod sini nga may uyat sa mga gun for hire, may kaangtanan sa robbery kag pati na sa kidnapping.
Sa subong ginapressure na sini ang South Cotabato PNP agud gilayon nga mahatagan sang solusyon ang patterned killing kanday Brgy. Topland kapitan Baltazar Bermil nga gin sundan ni Polomolok PNP Deputy Chief of Police PSI Hernan Gabat kag ang pinakabag-o amuh ang pagpatay kay PO2 Charlie Liva.
Bangud sa nasambit nga panghitabo, sa oras nga indi gilayon masolusyun, magapabulig na sa iban pa nga mga otoridad agud matuldukan ang serye sang mga pagpatay.
