KORONADAL CITY-Emosyunal nga nagpangayo sang bulig sa waragwagan sang Bombo Radyo Koronadal ang isa ka mister angot sa sitwasyon sang iya asawa sa bahin sang pungsod Saudi Arabia matapos nga wala na sini makontak ang asawa nga ginkilala kay Analyn Ogeda nga residente sang Brgy. Lambayong, Tampakan, South Cotabato.
Samtang ginkilala naman ang mister nga si Elmer Ogeda, kun sa diin nagahilibion pa ini nga nagsaysay nga madugay na ini nga wala na storya ang asawa matapos nga ginselosan ini sang amo nga babaye kag ginpasa pasa sa mga otod sini.
Suno kay Elmer, ginhatagan na lamang ini sang plane ticket sang iya nga amo kag ginsugtan na nga makapuli sa Pilipinas kag gindul-ong sa iya agency nga Al Omar Manpower Agency.
Samtang nakakontak naman suno pa ang misis sini sa iya nga bayaw matapos nga may kasubong nga OFW nga nagpahulam sang cellphone sa iya sa agency matapos nga ginkuha suno pa ang iya nga cellphone kag ginakulong ini sa isa ka hulot nga wala sang bentana kag indi pagtugutan nga makapuli sang iya nga agency.
Nahibaluan nga iya naman nga ginpauntat sa pag eskwela ang iya nga bata matapos nga indi na sini maatipan sa tuman nga pagpinsar sa sitwasyon sang iya nga asawa.
