KORONADAL CITY- Magadala sang positibo epekto ang paghilway sang Marawi City sa kamot sang terorista nga Maute-ISIS makaligad ang halos 5 ka bulan nga pakig engkwentro sa tropa sang gobyerno sa local kag mga foreign terrorist sa main battle ground.
Ini kasunod sang kamatayon sang 2 ka lider sang terorista nga grupo nga sanday Isnilon Hapilon kag Omar Maute kahapon sang kaagahon kag pag-anunsyar ni Pres. Rodrigo Duterte sang liberasyon sang Marawi City kagina sang hapon.
Kaangot sini, sa ekslusibo nga interbyu sang Bombo Radyo Koronadal kay South Cotabato Governor Daisy Avance Fuentes malipayon ini ilabi na nga nagbunga ang sakrispisyo sang mga suldado nga nautas ang kabuhi sa pagbawi sa nasambit nga syudad sa kamot sang mga terorista.
Samtang bangud sa dako nga damyos nga ginbilin sang gyera, ginalauman nga magalab-ot sa 20 ka tuig pa bag-o mabalik sa normal ang Marawi City ilabi na nga wasak ang bug-os nga syudad sa nasambit nga kinagamo.
Nagpanawagan man ini sa mga pumuluyo sang South Cotabato nga indi pagtugutan nga matabo sa probinsya ang nagluntad sa Marawi City makaligad napabay-an nga magpamugad ang mga terorista sa nasambit nga lugar kun sa diin dapat may hugot nga koneksyoh ang mga pumuluyo kag mga otoridad agud indi makasulod ang anuman nga terorista nga grupo.
