KORONADAL CITY – Nakalab-ot na sa probinsiya sang South Cotabato ang programa nga Duterte’s kitchen nga nagapakaon sa mga pigado kag gutom nga mga bata nga ginlunsar sang mga tagasuporta ni Pangulong Rodrigo Duterte.
Sa interbyu sang Bombo Radyo Koronadal kay Gail Gumana, operations manager sang Duterte’s kitchen, malipayon sila nga ginlunsar ang nasambit nga programa sa Brgy. Concepcion, Koronadal City.
Suno kay Gumana, positibo nga ginbaton sang mga benepisaryo ang nasambit nga programa kun diin lubos ang pasasalamat sang mga residente sa nasambit nga lugar.
Tinutuyo sangn nasambit nga programa nga wala na sang Pilipino nga matulog nga gutom diin man nga lugar sa pungsod.
Ang nasambit nga feeding program ang ginapatigayon man sa mga probinsiya sang Sultan Kudarat kag Maguindanao.
Nahibaluan nga ang Duterte’s kitchen ang ideya ni Energy Secretary Alfonso Cusi, Vice chairman sang PDP-LABAN kun diin ginsunod ang libre nga lugaw ni Pres. Duterte sa Davao City.
Target suno pa sang nasambit nga programa nga mapatuman ini sa bug-os nga pungsod kag indi lamang sa Mindanao para sa mga pigado nga wala sang ikasarang nga magbakal sang pagkaon.
