KORONADAL CITY – Nagpanawagan si South Cotabato Governor Daisy P. Avance Fuentes sa mga durugista kag mga narcopoliticians nga magsungka na antes pa maulihi ang tanan kag indi mabutang sa delikado nga sitwasyon ang ila nga kabuhi.
Ini ang ginpahayag ni Governor Fuentes sa interbyu sang Bombo Radyo Koronadal bilang reaksiyon man sa pagsungka ni Maasim Mayor Anecito “Jojo” Lopez kahapon matapos ang ginpatigayon nga raid sa resthouse sang alkalde.
Sandig pa kay Fuentes, wala niya ginahusgaran si Lopez bangud iya sang mga otoridad trabaho ang pagdeterminar kun matud nga may sala ini kag isa ka drug Lord.
Dugang pa sini nga dapat mahadlok ang mga durugista sa ginapatigayon nga raid sang mga otoridad labi pa nga may mabaskog sila nga suporta gikan sa national government ukon mismo kay Pangulong Rodrigo Duterte.
Ginkalipay man sang gobernadora ang boluntaryo nga pagsungka ni Mayor Lopez kay Senator Manny Pacquiao.
