KORONADAL CITY- Ginalagas na sang 27th Infantry Battalion Philippine Army sa bulig sang T’boli South Cotabato PNP ang masobra 30 ka mga armado nga myembro sang New People’s Army nga responsable sa panibag-o nga pagpang-atake sa Sumifru Banana Plantation sa Brgy. Laconon T’boli South Cotabato.
Sa interbyu sang Bombo Radyo Koronadal kay Police Chief Inspector Ramil Villagracia, hepe sang T’boli PNP, nagapatigayon sang pagpang atake ang grupo nga ginapamunuan suno pa sang isa ka kumander Alfie sa nasambit nga baana plantation kun sa diin ila ginharass ang mga gwardya kag gindis-armahan.
Luwas sini, sila ang nagpatigayon man sang pagpangsunog sa plantasyon kag mga ekwipo nga nagalab-ot sa P6 million ang ginbilin nga damyos.
Nahibaluannga ang ila panibag-o nga pagpang atake ang isa ka pagpanimalos sa indi suno pamaayo nga pagpamalakad sa nasambit nga kumbuyuhan apang ginkondena naman ini sang mga otoridad kag lokal nga gobyerno sang nasambit nga banwa ilabi na kag notoryus ang nasambit nga grupo sa pagpatigayon sang bayolente nga mga kalakasan.
Kun madumduman subong nga bulan ini na ang ikaduha nga pagpang-atake sang NPA sa banwa sang T’boli South Cotabato kun sa diin sini nga nakaligad nga adlaw gin-atake man nila ang Brgy. Tudok kag gindis-armahan ang mga BPAT’s sa nasambit nga banwa.
