KORONADAL CITY – Nakaluwas gikan sa pagkaanod sa baha tuga sang mabaskog nga bubo sang ulan ang isa ka babaye sa siyudad sang Koronadal.
Ginkilala ni Brgy. Chairman Gregorio Presga, ang biktima si Morita Bastian nga residente sang nasambit nga lugar.
Suno kay Presga papuli na si Bastian gikan sa pagdamo sa bukid sang gin-anod sang dako nga volume sang tubig baha tuga sang mabaskog nga ulan.
Nahibaluan nga gin-anod sa relocation site sa El Gawel ang biktima sang maluwas sang mga residente didto.
Sa subong, nagapaayo na sa South Cotabato Provincial Hospital ang biktima.
Samtang, ginsuspender naman ang klase sa elementarya kag sekondarya sa Brgy. Poblacion, Tantangan, South Cotabato bangud man sa pagbaha.
Naglab-ot sa 10 ka purok ang apektado kag gilayon nga gindeklarar ang pagsuspender sang klase labi nga kag indi maigo ang mga nagapanguna nga dalanon.
Yara sa halos 100 indibidwal naman ang nagbakwit kag nagapabilin sa evacuation center sang nasambit nga banwa.
Padayon naman ang monitoring ng South Cotabato Provincial Risk Reduction and Management Office (PDRRMO) sa napagit nga malapnagon nga pagbaha sa Brgy. Poblacion sa banwa sang Tantangan, South Cotabato.
