KORONADAL CITY- Naglab-ot sa 6 ka mga bomba kag matag-as nga kalibre sang armas luthang ang ginsungka sang 10 ka mga rebelde nga New People’s Army kag 2 ka bomber sa militar sa Sen. Ninoy Aquino, Sultan Kudarat.
Sa interbyu sang Bombo Radyo Koronadal kay 33rd IB Battalion Commander Lt. Col. Harold Cabunoc, ang mga ginsungka nga bomba ang sarang nga makapatay sang isa ka platoon kag may ikasarang nga palukpon ang mga tanke sang militar.
Kaangot sini, dako nga kawad-an sa NPA ang 2 pa ka trained bombers nga nag-ako antes magsungka sa 33rd IB amh ginpaidalom anay sa training sang mga rebelde sa paghimo sang bomba sa Compostela Valley.
Sa subong, nagpamalibad anay nga hingadlan sang militar ang mga nagsungka samtang ginpaidalom pa ang mga ini sa imbestigasyon.
Ginalauman nga madugangan pa ang numero sang mga armas nga marecover sa oras nga itudlo sa mga nagsungka nga rebelde ang ginataguan nila sang ila kagamitan.
