KORONADAL CITY- Nagaluntad na suno pa ang food shortage sa pila ka bahin sang Mexico City ang capital sang pungsod Mexico nga isa sa mga lugar nga tuman nga gin-igo sang Magnitude 7.1 nga linog.
Sa ekslusibo nga interbyu sang Bombo Radyo Koronadal sa Overseas Filipino Worker nga si Mera Megrinio Castro nga halin sa Valencia, Bukidnon kag nakapangasawa sa nasambit nga pungsod, problema sa pila ka bahin sang syudad ang kakulangan sang tubig nga mainom makaligad maguba ang pila ka water system kag mawad-an sang kuryente ang nasambit nga syudad kag mga kalapit nga estado.
Dugang pa sini nga sa subong pabudlayanay ang mga rescue workers sa paghukay sang mga patay kag mga posible nga survivors nga natabunan sang mga nagtiphag nga edifisyo.
Kaangot sini tuman naman nga nagakasubo ang mga himata sang yara sa 25 ka mga bata nga natabunan sang nagtiphag nga classroom sang Rebsamen School.
Samtang maswerte naman nga luwas si Mera kag ang pamilya sini makaligad ang nagluntad nga mabaskog nga linog.
Sa subong ginabulubanta nga yara na sa 300 ang numero sang mga patay sa nasambit nga kalamidad.
