KORONADAL CITY-Ginapreparar na ang patong patong nga kaso nga ipasaka sa lima ka miyembro sang armado nga grupo nga natikma sang mga otoridad sa bisa sang isa ka search warrant kag arrest warrant sa banwa sang Kalamansig, Sultan Kudarat.
Suno kay P/Sr. Supt. Raul Supiter ang Provincial Director sang Sultan Kudarat PNP,madugay na nga ginareklamo ang nasambit nga grupo bangud sila man ang yara sa likod sang nagapangbiktima sa mga coastal areas sang Sultan Kudarat.
Estratihiya suno pa sang mga ini nga palapitan ang bangka sang mga mangingisda kag ginapalangoy na lamang sila agud sila ang magkuha sa mga isda.
Magluwas diri, ginapatay man sang mga pirata sa dagat ang ila nga biktima nga mangingisda.
Nakuha sa ila kuta ang apat nga armalite rifle, duha ka granada, kalibre 45 kag assorted nga mga bala.
Samtang padayon naman nga ginapangita ang kumander sang grupo nga ginkilala kay kumander Wilson matapos ini nga makalagyo.
Sa subong nagapabilin ang mga ini sa Sultan Kudarat Police Provincial Headquarters para sa imbestigasyon.
