KORONADAL CITY– Gindul-ong na sa iya ulihi nga palahuwayan ang mamamahayag nga gintiro patay sang riding in tandem sa President Quirino, Sultan Kudarat nga si Leodoro Diaz.
Ginpahayag ni Bombo Radyo Koronadal Correspondent Larry Geronio nga gintambungan mismo sang mga opisyal sa lugar nga ginpangunahan sang alkalde sang Pres. Quirino nga si Mayor Azel Mangudadatu.
Kagab-i isa naman ka pagsinapol ang ginpatigayon kun sa diin mismo nga si Undersecretary Joel Sy Egco, Executive Director of the Presidential Task Force on Media Security ang nagpanguna.
Kaangot sini, nagsaka na sa 400K ang patong sa ulo sang mga perpetrators sang mamamahayag kun sa diin una na nga ginpahayag ni President Quirino Mayor Mangudadatu nga maghatag ini sang 100,000 , ginsundan sang 200,000 gikan sa Provincial Government sang Sultan Kudarat kag 100,000 gikan sa wala na ginhingadlan nga tawo.
Sa pihak nga bahin, ginhingyo sang mga media practitioner sa Sultan Kudarat nga liwat buhion ang pag-armas sa mga mamamahayag bilang protekta kun sa diin nagpromisar si Usec Egco nga iya ini hatagan sang igtalopangod.
