KORONADAL CITY-Panibag-o nga shooting incident na naman ang nagluntad alas 7 kagab-i sa Barangay Pangasinan, Koronadal City.
Ginkilala ang biktima nga si Pedro Beltran Cortado, yara sa legal nga edad, isa ka mangunguma kag residente sa nasambit nga lugar.
Sa impormasyon nga ginpalab-ot sang otod sini sa Bombo Radyo, duha ka lalaki suno pa nga sakay sang XRM motorcycle nga wala sang plate number ang una na nga nagpamangkot kun sa diin si Pedro.
Sang gintudlo kun sa diin ini, gilayon nga ginkadtuan sang mga suspek kun sa diin nagabaligya ini sa ila nga tindahan.
Nagpakuno-kuno pa ang mga ini nga magbakal sang ilimnon kag sang ginhatag na ini, gilayon nga gingabot ang armas.
Gilayon naman nga nagdalagan si Pedro apang nakaangkon ini sang igo sang bala sa tiyan.
Sa subong blangko pa ang mga otoridad sa nasambit nga pagpangluthang bangud nagaguwa nga wala sa drug watchlist sang PNP ang biktima samtang nagapadayon naman ini nga nagapaayo sa SoCot Provincial Hospital.
