KORONADAL CITY-Mas ginpahugtan pa ang mga qaurantine checkpoints kag quarantine services sa Rehiyon 12 kasunod sang napagkit nga avian flu outbreak sa Pampanga.
Ini ang ginpahayag ni Department of Agriculture 12 Regional Director for Technical Operations Dr. John Pascual sa eksklusibo nga interbyu sang Bombo Radyo Koronanadal.
Tinutuyo sini nga masiguro nga indi makasulod ang virus sa Rehiyon bangud ang mga migratory bird amo ang nagadala sini.
Nahibaluan nga sa Rehiyon 12 madamo ang mga migratory birds nga nagagikan sa nagkalain-lain pungsod ilabi na sa mga backdoor sa pungsod Malaysia, Indonesia kag iban pa.
Bilang preparasyon gilayon nga nagsapol ang DA 12 kag ang gindihon nga avian flu task force nga ginalakipan sang mga veterinary officers sa Rehiyon, National Meat Inspection Service kag veterinary quarantine services.
Sa subong nagapabilin naman nga luwas ang mga poultry products sa Rehiyon bangud sa hugot na nga ginadilian ang pagbiyahe sang mga ini gikan sa Luzon.
