KORONADAL CITY- Preparado na ang gindihon nga Task Force laban sa Avian Flu Virus sa probinsya sang South Cotabato.
Suno kay South Cotabato Provincial Veterinary Officer Dr. Flora Vigot, tinutuyo sang nasambit nga task force ang mapunggan nga makasulod ang nasambit nga virus sa probinsya nga subong nagalapta sa probinsya sang Pampanga.
Ang nasambit nga task force ang ginalakipan sang DILG, PNP, Health Sector kag iban pa nga ahensya sang gobyerno.
Nahibaluan nga nagtuga sang pagkaalarma ang nasambit nga outbreak kun sa diin ginmando sang Department of Agriculture ang pag-ihaw sa nilibo nga manok, pato kag pispis nga naigo sang balatian.
Kaangot sini apisar dyutay ang tiyansa nga malatnan ang tawo sa Probinsya indi sa gihapon dapat makampante ang publiko kag magpabilin nga vigilante kag alerto.
Samtang ginbawi naman sang Provincial Veterinary Office ang kabalak sang publiko batuk sa mga karne sang manok, itlog kag iban pa bangud wala naga-import ang probinsya sa baylo ang South Cotabato pa ang nagasuplay sini sa Luzon.
Ginpasiguro naman nga nagapatigayon na sang surveillance kag blood sampling ang ahensya ilabi na sa mga poultry farms agud malikawan ang pag-angkon sang kaso sang Avian Flu Virus sa South Cotabato.
