KORONADAL CITY – Arestado ang lima ka drug personalities sa ginpatigayon nga operasyon sang Philippine Drug Enforcement Agency (PDEA) Regional Office XII sa pagpanguna ni Director Gil Cesario Castro sa Purok Gracia Villa, Barangay Zone I, Koronadal City.
Nahibaluan nga target sang operasyon si Roy Palmares Oligo Alias Apnoy, 20 anyos , single, laborer kag residente sang nasambit nga lugar kun sa diin nakigtransaksyon ini sa PDEA agent nga nagpakuno-kuno nga magbakal.
Matapos ang pag-aresto sa target, 2 search warrants ang ginserbe sa panimalay sini nga nagresulta sa pagkakumpiskar sang 1 large sachet kag 1 small sachet sang shabu nga may kabug atun nga 30 grams kag may estimated value nga Php 150,000.00, 9 open transparent plastic sachets nga may shabu residue, 7 packs nga dried marijuana leaves nga may kabug aton nga 500 grams, 1 pakete sang marijuana seeds kag drug paraphernalia.
Sa nasambit nga operasyon naaresto man sanday Reuben Alaan Pangantihon, 34 anyos, may-asawa, laborer, residente sang Purok Gracia Villa, Brgy. Zone I, Koronadal City, Leonel Billones Pastellero, 29 years old, single, laborer, residente sang Purok Mangga, Brgy. Zone I, Koronadal City, Abet Roger Sarip, 42 years old, , may asawa, negosyante, residente sang Purok San Antonio Phase 1, Brgy. Sta. Cruz, Koronadal City kag isa ka lalaki nga menor de edad.
Ang mga kaso sa pagbayular sa Section 5 okun Sale of Dangerous Drugs, Section 6 Maintenance of a Den, Section 11 Possession of Dangerous Drugs kag Section 12 Possession of Drug Paraphernalia, Article II of Republic Act 9165 okun Comprehensive Dangerous Drugs Act of 2002 ang ipasaka batuk kay Oligo samtang ang 4 nga iban pa nga suspek ang maga atubang sa kaso nga pagbayular sa Section 7 okun Visitors of a Den kag Section 15 Use of Dangerous Drugs.
Ang mga suspek ang nakadetain na sa PDEA ROXII Detention Facility.
