KORONADAL CITY – Ginpanginwala sang kapulisan ang naguwa nga report nga may mga himata sang Maute terror group nga nagapanago humalin pa sang Eid’l Fitr sa isa ka barangay sa banwa sang Tboli, South Cotabato.
Sa interbyu sang Bombo Radyo Koronadal Police Chief Insp. Ramil Divinagracia, matuod nga may 31 ka mga Internally Displaced Persons (IDP’s) gikan Marawi City nga nagadayon subong sa isa ka apartment sa Purok 3, Barangay Lugan apang indi suno pa sila himata sang mga Maute.
Suno kay Divinagracia 19 ka babaye kag 12 ka mga bata ang mga bakwit nga ila nga nalista base sa ginpatigayon nga profiling nga nagbakwit gikan sa Marawi City bangud apektado ang mga ini sang kinagamo sa lugar.
Ginrason pa sang mga babaye nga IDP’s nga indi nila kaupod ang ila mga bana bangud nabilin sa Marawi agud mabantayan ang ila nga puluy-an kag mga palangabuhian didto.
Nagpromisa naman ang mga ini sa temporaryo lamang ang pagpabilin sa lugar bangud sa tion nga matapos na ang kinagamo sa Marawi, magabalik na sila didto.
Gilayon naman nga ginhatagn sang bulig sang MSWDO-Tboli ang mga bakwit sa lugar matapos ang ginpatigayon nga profiling.
Una diri, ginsugid sang pila ka mga residente sa nasambit nga lugar nga may mga himata sang Maute nga nagapanago sa ila kun diin ang iban ang pilason pa apang wala suno pa ginpahibalo sang tag-iya sang apartment sa mga Barangay Officials sa ila nga lugar.
