KORONADAL CITY- Nagsugod na ang pagpatrolya sang Philippine Navy kag Philippine Marines sa kadagatan nga sakop sang Rehiyon 12 agud nga bantayan ang coastal area sang rehiyon bangud sa sightings suno pa sang pila ka armado nga grupo.
Sa interbyu sang Bombo Radyo Koronadal kay Police Supt. Romeo Galgo, Police Information Officer sang PNP 12, nakig-angot na sa ila ang mga kasuldaduhan angot sa igapatigayon nga pagpatrolya sa kadagatan nga sakop sang Sultan Kudarat partikular na ang banwa sang Lebak kag Kalamansig nga ginpahayag may presensya sang armado nga grupo.
Samtang, nakadeploy man ang mga sea assets sang militar sa nasambit nga mga banwa labi na nga pila sa mga rebelde nga grupo kasubong sang BIFF kag terorista nga Abu Sayyaf ang nag-agi sa mga kadagatan agud nga makasulod sa pila ka lugar.
Kaangot sini ginpasaka pa sang PNP 12 ang alert status sa bug-os nga Rehiyon 12 kag ginpasiguro ang kooperasyon sang PNP kag AFP.
