KORONADAL CITY- Nasita si Koronadal City Mayor Peter Miguel sang Koronadal City PNP angot gihapon sa ginapatuman nga curfew sa siyudad.
Ini ang ginpahayag ni Mayor Miguel sa interbyu sang Bombo Radyo Koronadal kun diin natabo ang insidente sang magpagab-i ini sa dalan agud nga matilawan kun ginapatuman sang maayo sang kapulisan ang ila nga responsibilidad kag kun ginaseryoso ang obserbasyon sang Curfew Hour.
Ginkalipay naman sang alkalde nga nasampolan ini bangud nagakahulugan lamang nga ginpatuman ang hugot nga seguridad sa siyudad labi pa nga ginapangitaan pa siya sang ID sang mga pulis sang siya ang madakpan sa kaagahon.
Ginpabugal man sang alkalde ang patas nga pagpatuman sang layi sang kapulisan sa siyudad agud nga maprotekhiran ang mga pumuluyo sa siyudad sang Koronadal.
