KORONADAL CITY – Nagpatigayon sang combat operation ang tropa sang Public Safety Company matapos ang nakit-an nga sightings sang mga rebelde nga NPA sa banwa sang Lake Sebu, South Cotabato.
Inia ng ginpahayag ni Pol. Senior Supt. Franklin Alvero, provincial director sang South Cotabato, sa interbyu sang Bombo Radyo Koronadal.
Suno kay Alvero, nagpatigayon sang pagpatrolya ang kapulisan sa nasambit nga lugar matapos nga nahadlok ang mga residente sa presensiya sang mga armado nga nagapatogayon sang recruitment didto.
Dugang pa ni Alvero, ang mga NPA ang masami nga makit-an sa mga boundaries sang probinsya sang South Cotabato, Sultan Kudarat kag Davao del Sur.
Kaangot sini, nagpanawagan si Alvero sa mga IP’s sa lugar nga indi magpadala sa matam-is nga dila sang mga rebelde sa nagapadayon nila nga recruitment sa probinsiya.
Samtang, nagtuga man sang kahadlok kag pagbakwit sang mga residente sa Sitio Hechanova, Barangay Paraiso, banwa sang Banga, South Cotabato matapos mareport ang sightings sang mga armado sa lugar.
Nahibaluan nga sa kahadlok snag mga residente, nagbakwit ang mga ini sa Barangay Hall kaupod ang ila mga kabataan kag nagpabilin didto tubtob subong.
Ginpasiguro naman ni Alvero nga luwas ang mga ini kag wala na nakita pa ang nareport nga sightings sang mga armado lakip na sa mga banwa sang Norala kag Tantangan.
