KORONADAL CITY – Labi pa nga nabalaka subong ang Integrated Provincial Office sang South Cotabato nga magasaka pa ang numero sang mga inmates sa probinsiya nga positibo sa Human Immunodeficiency Virus ukon HIV matapos nga may panibag-o nga napagkit sa district jail sa banwa sang Polomolok.
Suno kay South Cotabato HIV/AIDS Focal Person John Arlo Codilla, yara sa 3 ka mga inmates pa sa Polomolok District Jail ang panibag-o nga nagpositibo sa HIV.
Madumduman nga una nga nagpositibo sa HIV ang duha ka mga preso sa South Cotabato Provincial Rehabilitation and Detection Center ukon provincial jail.
Ginpahayag ni Codilla nga nadiskubrihan nga HIV positive ang mga preso makaligad nga magpaidalom sa quarterly mobile testing sang provincial health office.
Apang, kumpiyansa naman ang opisyal nga indi na makalalaton ang HIV positive nga mga preso bangud nahibaluan nila kun ano ang himuon makaligad nga magpaidalom sa anti retrieval treatment sang HIV/AIDS Core Team Clinic ukon HACT sang IPHO.
Dako naman ang posibilidad nga nakuha sang mga inmate ang virus paagi sa man to man sexual contact.
Sa subong, target nila nga ipaidalom sa HIV/AIDS test ang 1,400 inmate sa South Cotabato Provincial Jail.
