KORONADAL CITY – Nagapanawagan sa subong ang pamilya sang isa ka suldado nga taga Sultan Kudarat nga napatay makaligad nga maigo sang sniper sang Maute kay Pangulong Rodrigo Duterte nga tapuson na ang Marawi crisis kag pulbuson ang mga terorista.
Suno sa iloy ni PFC John P. Bernaldez nga taga-Barangay Kalanawe 2, President Quirino, Sultan Kudarat, nagatindog nga bread winner sang ila nga pamilya ang napatay nga suldado kun diin indi lamang mga utod sini ang iya ginapaeskwela kundi mangin ang hinablos sini.
Rason nga dako nga kawad-an nga napatay ini kag ang masakit pa bangud Maute terrorist ang nakapatay sa iya samtang nagapakigbato sa Marawi City.
Ulihi nga nakatext si PFC Bernaldez sang Hunyo 26 kun diin ginkumusta pa sini ang iya pamilya kag nagpamangkot kun pila ang budget sa pagpakay-o sang ila nga puluy-an.
Nahibaluan nga napatay si PFC Bernaldez samtang nagarescue sa kaupod nga pilason samtang nagapadayon ang opensiba sang AFP batuk sa Maute terror group.
Kaangot sini, lubos naman nga ginkasubo sang utod sini ang kamatayon sang suldado kun diin nakahanda ini nga magsulod sa pagkasuldado agud nga matimalos ang utod sa mga terorista.
Sa subong, naghatag na sang bulig ang local government sang President Quirino sa pamilya sang napatay nga suldado.
