KORONADAL CITY- Magapadayon sa gihapon ang selebrasyon sang T’nalak Festival sa South Cotabato sa pihak sang Martial Law kag pagdeklarar sang Curfew.
Sa interbyu sang Bombo Radyo Koronadal kay Luz Fontanilla, committee chairman sang street dancing competition, may ginpatigayon na nga pagsinapol ang Provincial Government sang South Cotabato kag Koronadal City Government agud mahisgutan ang mangin tikang sa aktibidad sa idalom sa gihapon sang ginapatuman nga curfew hour.
Nahibaluan ng mas ginpahugtan ang seguridad kag mas ginpanubuan ang oras sang aktibidad agud masunod sa gihapon ang ginapatuman nga Martial Law kag obserbasyon sang curfew kun sa diin pag abot sang takna alas 11 sang gab-i dapat mauntat na ang pagsinadya kag aktibidad kag dapat magpauli na ang mga tao.
Samtang sa pihak sini ginpasiguro naman sang Provincial Government nga mangin masadya sa gihapon kag madayon ang tuigan nga selebrasyon apisar limitado sa oras.
Nagpaandam naman ang mga otoridad nga magpabilin nga vigilante sa tanan nga oras kag magsunod sa mga regulasyon agud wala sang problema.
