KORONADAL CITY- Naglab-ot sa 70 ka mga residente sa isa ka barangay sa banwa sang Lake Sebu, South Cotabato ang apektado sang diarrhea outbreak.
Suno kay Dr.Jocelyn Bayquin, Municipal Health Officer sang Lake Sebu, mga residente sang Sitio Salban, Barangay Ned sa nasambit nga banwa ang nagabalayian bangud sa diarrhea kun diin may walo ka bulan man ang napatay apang ginakumpirmar pa kun ini ang bangud sa nasambit nga sakit.
Posible suno pa nga nagikan sa kontaminado nga tubig sa bubon nga ila ginainom ang rason sang pagbalatian sang mga residente bangud wala pa sang water system ang ila nga barangay.
Nahibaluan nga makapila ka beses naman nga nareport nga may mga nagbalatian sang diarrhea sa nasambit nga lugar apang subong lamang ang may pinakamadamo nga biktima.
Mas labi naman nga naalarma ang mga opisyal bangud wala nagapadulong sa hospital ang mga nagabalatian bangud sa kalayuon sang ila nga barangay.
Kaangot sini, magapadala na lamang sang medical team sa lugar ang Integrated Provincial Health Office agud nga mabulong ang mga biktima.
