KORONADAL CITY- Nagapabilin nga positibo ang panan-awan sang mga South Cotabateños sa sulod sang isa ka tuig nga pagpamuno ni Pres. Rodrigo Duterte bilang punong ehekutibo sang pungsod.
Suno sa pila ka mga residente sa probinsya, pagahatagan nila sang pinakamataas nga rating nga 10 ang presidente bangud sa nabatyagan nila ang iya nga pag-ulikid sa mga Muslim kag Lumad nga wala mahatagan sang igtalupangod ang mga hibubun-ot sang naglabay nga administrasyon kun diin base sa random survey sang Bombo Radyo Koronadal gintawag pa nga incomparable ang pangulo kag most hard working nga lider.
Samtang, pila naman ang nagpahayag sang suporta sa Martial Law kag may pila man nga naghatag sang rating nga 6 bangud suno pa wala dapat nga ginpaidalom sa Martial law ang Mindanao bangud sa Marawi lamang ang may problema.
Kaangot sini, ginpahayag naman ni Deputy Speaker for Mindanao kag South Cotabato 2nd District Congressman Ferdinand Hernandez, nga pagahatagn niya sang Very Good rating kag gintawag pa nga Excellent ang pagpamuno sini kun diin siya lamang daw ang Presidente sang pungsod nga maisog nga magpatuman sang ginpromisa sa pungsod kag may yara sang maisog nga panindugan agud pakigbatuan ang terorismo labi na sa isla sang Mindanao.
