KORONADAL CITY- Ginkaalarma ni 33rd Infantry Batallion Commander Lt. Col. Harold Cabunoc ang naguluwa nga impormasyon angot gihapon sa pagpamahog sang terorismo sa pila ka bahin sang Maguindanao kag Sultan Kudarat.
Sa interbyu sang Bombo Radyo Koronadal kay Col. Cabunoc, desperado na suno pa ang mga terorista nga grupo kasubong sang Bangsamoro Islamic Freedom Fighters (BIFF) sa ila nga tikang agud makahimo sang pagpangatake sa pila ka bahin sang Mindanao labi na kag madamo sa ila mga lider ang napatay na sang mga militar.
Kaangot sini, nagpaandam naman si Col. Cabunoc sa Muslim community nga mangin alert angot sa nabaton nila nga intelligence report nga pila sa mga Imam sa probinsya ang ginagamit na sang mga terorista nga grupo agud nga magpalapta sang sala nga ideolohiya agud nga maglunsar sang kalakasan kag Jihad batuk sa mga kristiyano.
Nagpanawagan man ini sa mga Muslim nga magbulig sa ila agud nga matumod ang mga Imam nga ginagamit sang mga terorista agud mapunggan ang anuman nga pamahog sang terorismo sa lugar.
