KORONADAL CITY – Nagtuga sang pagka-alarma ang presensya sang madamo nga mga suldado sa sentro sang Tacurong City, Sultan Kudarat sang ginpatigayon ang Military excercise sa pagpanguna sang 1st Mechanized Infantry Brigade Philippine Army.
Nahibaluan nga ang nasambit nga war game ang kalakip sa sabat sa nagapadayon nga pamahog sang terorismo sa probinsya sang Sultan Kudarat kag kaiping nga mga probinsya sang Maguindanao kag South Cotabato kaangot gihapon sa ginapatuman nga Martial Law sa bug-os nga isla sang Mindanao.
Nahibaluan nga masobra isa ka gatos nga myembro sang militar ang nakigbahin kaupod ang pila ka myembro sang Sultan Kudarat PNP kag iban pa nga mga myembro sang ahensya sang gobyerno.
Napili naman nga ipatigayon ini sa matawo nga lugar kag sa tunga sang dalan sa nasambit nga syudad rason nga madamo man ang nakasaksi sa war game.
Kaangot sini, gindulan ni Corporal Glenn Pitogo ang kabalak sang mga pumuluyo bangud ang war game ang dako ang mabulig bilang preparasyon sang militar, Sultan Kudarat PNP kag emergency responders sa oras nga magmatuod ang man made disaster sa nasambit nga probinsya.
Ang nasambit nga war game ang ginsaksihan man nanday Sultan Kudarat Governor Pax Mangudadatu kag Tacurong City Mayor Lina Montilla .
