KORONADAL CITY- Ginpaidalom na sa imbestigasyon ang 2 ka mga katapo sang Bangsamoro Islamic Freedom Fighters nga kalakip suno pa sa 200 ka mga rebelde nga nagpang-atake sa Brgy. Malagakit Pigcawayan North Cotabato.
Nahibaluan nga naarestar sa military checkpoint sa Datu Salibo Maguindanao ang 2 ka myembro sang bandido nga grupo nga ginkilala kanday Jahren Mantukay, 23 anyos kag Bardurim Limba 28 anyos nga mga katapo sang Bangsamoro Islamic Freedom Fighters Special Operations Group kag lunsay mga residente sang Shariff Saidona Mustapha Maguindanao.
Kaangot sini ang 2 ka rebelde ang ginasiling man nga right hand sang isa ka ginkilala kay Kumander Palos nga isa sa mga nag operate sang motorized banca nga gin-usar suno pa sang mga bandido nga makalab-ot sa nasambit nga banwa.
Luwas sa mga armas kag pampasigabon, narekober man sa posisyon sang mga ini ang 2 ka dako nga pakete sang shabu.
Kaangot sini, ginpasiguro naman ni PRO 12 spokesperson Pol. Supt. Romeo Galgo nga padayon ang ila paglagas kag monitoring batuk sa rebelde nga BIFF sa rehiyon 12.
