KORONADAL CITY- Patay ang isa ka notoryus nga drug pusher sa ginpatigayon nga operasyon sang kapulisan batuk sa iligal nga droga sa San Emmanuel, Tacurong City, Sultan Kudarat.
Ginkilala ang suspek kay Estong Baladsikan, yara sa legal nga edad kag residente sang nasambit nga lugar kun diin napatay ini matapos una nga magpalupok sa kapulisan samtang ginaserbihan sang search warrant sa puluy-an sini.
Sa nasambit nga operasyon narekober ang pila ka pakete sang shabu, nagkalain-lain nga sahi sang mga bala, armas kag eksplosibo.
Nahibaluan nga nadala pa sa hospital ang suspek apang gindeklarar nga Dead on arrival sang mga doktor.
Ang nasambit nga suspek ang madugay na nga ginamonitor sang PNP bangud sa kilala ini nga drug pusher kag notoryus man nga nagaangkon sang mga armas kag eksplosibo.
