KORONADAL CITY- Wala mapunggan sang ginapatuman nga curfew hour angot gihapon sa ginapatuman nga Martial Law sa Mindanao ang pagpakasal sang yara sa 73 ka magpares sa banwa sang Lutayan, Sultan Kudarat.
Nahibalyan nga ang seremonya sang kasal ang ginpangunahan mismo ni Lutayan Mayor Bai Princess Sakaluran kun diin nangin emosyonal ini bangud sa wakas natuman ang hingyo sang mga magpares sa ila nga banwa nga tigayon nga mangin legal ang pag-upod nila.
Ginsaksihan ang nasambit nga “kasalan ng bayan” ni Sultan Kudarat Governor Pax Mangudadatu.
Ang nasambit nga kasalan ang naglab-ot sa halos 6 ka oras apang nahimo sa gihapon nga matapos antes ang pag-abot sang alas-10 sang gab-i antes pa man nga nag-epekto ang curfew hour.
Nagparauli man ang mga bag-o nga kasal agud nga indi maabtan sang curfew sa dalan.
Nahibalyan nga hugot sa gihapon ang ginapatuman nga seguridad sa bug-os nga probinsya sang Sultan Kudarat bangud man sa pagpamahog sang terorismo.
