KORONADAL CITY- Nadugangan pa ang numero sang mga estudyante nga nagsaylo sa mga buluthuan sa Rehiyon 12.
Suno kay DepEd 12 information officer Antonio Maganto Jr. yara sa masobra 400 ka mga estudyante gikan sa Marawi ang nakaenrol na sa nagkalain-lain nga buluthuan sa Rehiyon 12.
Kaangot sini nagpaguwa sang standing order si DepEd 12 Regional Director Arturo Bayucot nga prayoridad sa gihapon nila ang mga estudyante gikan sa Marawi kun diin apisar yara na sa tunga-tunga sang klase, pagabatunon sa gihapon ang mga ini.
Samtang, wala sa gihapon makabalik sa normal ang sitwasyon sa Pigcawayan North Cotabato kun diin wala pa makabalik sa buluthuan ang mga estudyante gikan sa Brgy. Malagakit kag Brgy. Simsiman sa nasambit nga banwa lakip na ang kaiping nga banwa sang Aleosan bangud sa nagapadayon nga hot pursuit operation sang Militar batuk sa Bangsamoro Islamic Freedom Fighters nga nagpatigayon sang pagpangatake.
Sa subong, ginahulat na lamang ang go signal sang Armed Forces of the Philippines kun mahimo nga makabalik sa buluthuan ang mga estudyante nga apektado sang kinagamo.
