KORONADAL CITY- Ginapreparahan naman sang mga AFP reservist sang South Cotabato ang posibilidad nga pagdeploy sa ila sa Marawi City angot pa sa nagapadayon nga engkwentro sa lugar batuk sa ISIS-MAUTE.
Nahibaluan nga una nga gin-insister ni Rear Adm. Robert Empedrad sang AFP kag amo man ang Chief of staff sang Reservist and Retiree Affairs ang importansiya sang preparedness kag responsiveness sang AFP Reserve Force sa bug-os nga pungsod.
Bangud sini, ginalauma nga magasinapol ang Batallion Commander sang Marines Reserve sang South Cotabato kag Army Reserve agud nga talakayon ang mangin papel sang AFP reservist labi na sa ginapangatubang nga security crisis kag disorders sa pungsod agud nga magserbe nga force multipliers kag makabulig sa paghatag sang humanitarian assistance sa mga apektado nga residente.
Nahibaluan nga base sa datus sang AFP sa first quarter sang 2017, may kabug-usan nga 386,116 Army, Airforce, Navy kag Marine Reservist sa bug-os nga pungsod.
