KORONADAL CITY- Madinalag-on ang ginpatigayon nga joint law enforcement support operation batuk sa Bangsamoro Islamic Freedom Fighters nga supporter sang ISIS-Maute sa Brgy. Poblacion Shariff Aguak sa probinsya sang Maguindanao.
Nagresulta ang nasambit nga operasyon sa kamatayon sang isa sa mga most wanted nga katapo sang BIFF nga ginkilala kay Raul Angkay alyas Dok nga nagapangbulong sa mga pilason nga myembro sang terorista nga grupo.
Nahibaluan nga si Angkay ang isa man sa mga personalidad nga yara sa arrest order list sang Department of National Defense bangud sa kaso nga rebelyon kaangot sa gihapon sa ginapatuman nga Martial Law sa Mindanao.
Narekober sang gin-isa nga pwersa sang 601st Infantry Brigade, 603rd Infantry Brigade, Criminal Investigation Group sang Autonomous Region in Muslim Mindanao kag PNP Shariff Aguak ang matag-as nga kalibre sang armas luthang kag mga eksplosibo.
