KORONADAL CITY – Ginsulod sang militar ang ginapatihan nga factory sang bomba sang mga local terrorist sa Barangay Midtambakan, General SK Pendatun, Maguindanao.
Ini ang ginkumpirmar ni Lt. Col. Harold Cabunoc, commanding officer sang 33rd Infantry Batallion, Philippine Army.
Suno kay Cabunoc, nangin mabudlay ang pagsulod sa nasambit nga lugar bangud sa gilayon nga nakabantay ang mga armado kag ginpangluthang ang mga suldado rason nga nagresulta sa engkwentro nga nagdugay sang halos 45 minutos.
Nagapati si Cabunoc nga ang nasambit nga lugar factory sang mga Improvised Explosive Device (IED) nga amo ang ginapalupok sang mga terorista sa mga lugar sa Central Mindanao.
Nahibaluan nga antes pa man nasulod ang lugar madasig nga nakapalagyo ang mga armado sakay sang Bangka de motor padulong sa eastern part sang Maguindanao.
Posible suno pa nga gindala sang mga armado ang mga kagamitan sa paghimo sang bomba.
Sa subong, indi pa madeterminar kun may pilason ukon casualty sa mga rebelde apang maswerte naman nga wala sang casualty sa bahin sang mga suldado.
