KORONADAL CITY – Ginpasakaan na sang kaso si Engineer Talib Bayabao, ang provincial director sang TESDA-South Cotabato nga isa sa mga wanted nga ginapatihan may kaangtanan sa Maute terror group.
Inia ng ginkumpirmar ni PSSUPT. Franklin Alvero, ang provincial director sang South Cotabato sa interbyu sang Bombo Radyo Koronadal.
Suno kay Alvero, kaso nga paglapas sa Article 134 ukon rebelyon sang revised penal code of the Philippines ang ginapangatubang sini.
Sa madason nga semana pagahulaton na lamang ang mangin desisyon sang fiscal sa kaso ni Bayabao.
Suno sa iya, sa tion nga may basehan ang ginpasaka nga kaso, igapasaka na ini sa korte agud nga maserbihan sang warrant of arrest apang kun wala sang probable cause, mahimo nga madismiss ang kaso batuk sa nasambit nga opisyal.
Madumduman nga kalakip si Bayabao sa Arrest Order No. 2 nga ginpaguwa ni Defense Secretary Delfin Lorenzana bilang administrador sang martial law sang Mindanao nga suno pa financier, courier kag myembro sang Maute.
Una diri, ginkalipay naman ni Lorenzana ang pagsungka ni Bayabao.
Sa subong, nagapabilin ini sa kostudiya sang South Cotabato Provincial Police Office.
