KORONADAL CITY – Yara na sa kustodiya sang mga otoridad ang driver sang isa ka Hi-ace Van makaligad sini nga mabunggo ang isa ka Mobilio Vtech sa kalabaon sang national highway, Barrio Dos, Tacurong City.
Sa nasambit nga aksidente duha ang ginbawian sang kabuhi samtang 5 naman ang pilason.
Ginkilala ang mga napatay nga sanday Jaypee Morenio Auditor, 26, residente sang Zone 1, Barangay Libertad, Surallah, South Cotabato kag Akmad Muslimin Gani nga residente sang Cotabato City.
Samtang ang mga pilason ang magpamilya nga sanday SPO1 Abdulbasit Alano Bansawan, Asley Bansawan, Musi Makaday Bansawan, 7; Zaida Makalay Bansawan kag Jasmin Bansawan nga lunsay mga residente sang Purok 9, Barangay Poblacion, Tacurong City.
Sandig sa report, ang ginamaneho nga Van ni Omar Montawa Norodin ang nagbunggo sa Mobilio Vtech nga ginamaneho ni Airra Tolosa samtang mabaskog ang pagbubo sang ulan.
Nahibaluan nga gikan sa Tacurong City ang Mobilio kag padulong sa Isulan sang masugata ang Van nga may biyahe nga Cotabato City.
Sa subong, padayon nga ginabulong ang mga pilason nga biktima.
